ശ്രീമദ് ഭഗവദ്ഗീത - അദ്ധ്യായം -3 കർമ്മയോഗം - ശ്ളോകം 24
ഉത്സീതേയുരിമേ ലോകാ
ന കുര്യാം കര്‍മ്മ ചേദഹം
സങ്കരസ്യ ച കര്‍ത്താ സ്യാം
ഉപഹന്യാമിമാ പ്രജാഃ
ന കുര്യാം കര്‍മ്മ ചേദഹം
സങ്കരസ്യ ച കര്‍ത്താ സ്യാം
ഉപഹന്യാമിമാ പ്രജാഃ
ഞാന്‍ കര്‍മ്മം ചെയ്യുന്നില്ലെങ്കില്‍ ഈ ലോകങ്ങള്‍ ധര്‍മ്മലോപം കൊണ്ട് നശിച്ചുപോകും. അങ്ങിനെ വര്‍ണ്ണസങ്കരത്തിനു കാരണക്കാരനായി ഈ പ്രജകള്‍ക്ക് ദോഷം ചെയ്യുന്നവനായി തീരും.
ഞാന്‍ ആഗ്രഹങ്ങളെല്ലാം ഉപേക്ഷിച്ച് ആത്മസാക്ഷാല്‍ക്കാരത്തില്‍ മുഴുകി കഴിച്ചു കൂട്ടിയാല്‍ ജനങ്ങള്‍ അവരുടെ ജീവിതയാത്രയില്‍ എങ്ങിനെയാണ് പ്രവര്‍ത്തിക്കുക? ജനങ്ങള്‍ നാം ചെയ്യുന്ന കാര്യങ്ങള്‍ എന്താണെന്നു മനസ്സിലാക്കി നമ്മെ അനുകരിക്കുകയാണ് പതിവ്‌. നിലവിലിരിക്കുന്ന സാമൂഹ്യവ്യവസ്ഥിതി അഭംഗുരം തുടരണമെങ്കില്‍ നാം അവര്‍ക്ക് മാതൃയായിരിക്കണം. അതുകൊണ്ട് പ്രാപ്തന്‍മാരും വിദ്വാന്‍മാരുമായ ആളുകള്‍ യാതൊരു കാരണവശാലും കര്‍മ്മങ്ങള്‍ ഉപേക്ഷിച്ച് അലസന്‍മാരായി ഇരിക്കുവാന്‍ പാടില്ല.
ഞാന്‍ കര്‍മ്മം ചെയ്യുന്നില്ലെന്നു വന്നാല്‍ ലോകം അധഃപതിച്ചുപോകും. എല്ലാം കൂടിക്കുഴയുന്നതിന് ഞാന്‍ കാരണമാകും. ഇക്കാണായ എല്ലാവരും മലിനമാകാന്‍ ഇടയാകയും ചെയ്യും.
'ഏവം പ്രവര്‍ത്തിതം ചക്രം' എന്ന് നേരത്തേ പറഞ്ഞ 'യന്ത്രം' ഒരു നിമിഷം ഓഫായാല്‍ സംഭവിക്കാവുന്ന അവസ്ഥയാണ് പറയുന്നത്. കാലപ്രവാഹം നിലയ്ക്കും, എല്ലാവര്‍ക്കും എല്ലാറ്റിനും വഴി മുട്ടും. കാര്യകാരണ ബന്ധങ്ങള്‍ തകിടം മറിയും. പ്രവാഹം നിലച്ച നദിപോലെ ലോകം മൊത്തമായി മലിനമാകും.
(തുടരും.....)
No comments:
Post a Comment