ശ്രീമദ് ഭഗവദ്ഗീത - അദ്ധ്യായം -3 കർമ്മയോഗം - ശ്ളോകം 11
ദേവാന്‍ ഭാവയതാനേന തേ ദേവാ ഭാവയന്തു വഃ
പരസ്പരം ഭാവയന്തഃ ശ്രേയഃ പരമവാപ്സ്യഥ.
പരസ്പരം ഭാവയന്തഃ ശ്രേയഃ പരമവാപ്സ്യഥ.
ദേവന്മാരെ ഇതുകൊണ്ടു ആരാധിക്കുവി‍ന്‍. ആ ദേവന്മാര്‍ നിങ്ങളെ വ‍ര്‍ദ്ധിപ്പിക്കട്ടെ. പരസ്പരം തൃപ്തിപ്പെടുത്തി കൊണ്ടു പരമമായ ശ്രേയസ്സിനെ പ്രാപിക്കുവി‍ന്‍.
ബ്രഹ്മാവ് തുടര്‍ന്നു, നിങ്ങള്‍ നിങ്ങളുടെ കര്‍മ്മം അനുഷ്ഠിക്കുമ്പോള്‍ എല്ലാ ദേവന്‍മാരെയും നിങ്ങള്‍ പ്രസാദിപ്പിക്കുന്നു. അപ്പോള്‍ അവര്‍ നിങ്ങള്‍ക്ക് ആവശ്യമുള്ളതെല്ലാം നല്‍കുന്നു. നിങ്ങളുടെ കര്‍ത്തവ്യ നിര്‍വ്വഹണത്തില്‍ കൂടി നിങ്ങള്‍ എല്ലാ ദേവന്‍മാരെയും ഉപാസിക്കുകയാണെങ്കില്‍ അവര്‍ നിങ്ങളോട് അത്യന്തം പ്രീതരായിരിക്കും. അവര്‍ അസന്ദിഗ്ദ്ധമായി നിങ്ങളുടെ ക്ഷേമത്തില്‍ കുടുതല്‍ അടുക്കുന്നതിനു തല്‍പരരായിരിക്കും. ഇത് ദേവന്‍മാരും നിങ്ങളും തമ്മില്‍ പരസ്പരം കൂടുത‍ലായി അടുക്കുന്നതിനും സ്നേഹിക്കുന്നതിനും ഇടയാക്കും. ദേവന്‍മാരുടെ അനുഗ്രഹം നിങ്ങളുടെ പ്രവര്‍ത്തനങ്ങളെ വിജയിപ്പിക്കുകയും നിങ്ങളുടെ ആഗ്രഹങ്ങളെ സഫലമാക്കുകയും ചെയ്യും. നിങ്ങളുടെ വാക്കുകള്‍ സത്യവചനങ്ങളായി തീരും. അവ എപ്പോഴും ആദരിക്കപ്പെടും. നിങ്ങള്‍ അധികാരം പ്രയോഗിക്കാന്‍ ശക്തരായിത്തീരും. പൂക്കള്‍ ചൂടി ഫലങ്ങളും പേറി വസന്തത്തിന്റെ ആഗമനത്തിനു കാനനം കാത്തിരിക്കുന്നപോലെ, നിങ്ങളുടെ അജ്ഞാനുവര്‍ത്തി ആകാന്‍ ഐശ്വര്യ ദേവത കാത്തിരിക്കും.
(ക്ഷേത്രങ്ങളിലെയും കാവുകളിലേയും പ്രതിഷ്ഠകളെയോ പുരാണകഥകളിലെ കഥാപാത്രങ്ങളെയൊ അല്ല, പ്രകൃതിയിലെ പ്രതിഭാസങ്ങളെയാണ് ദേവകളെന്ന് പറയുന്നത്. മണല്‍ത്തരി മുതല്‍ ഹിമാലയം വരെയും മഞ്ഞു മുതല്‍ കൊടുങ്കാറ്റുവരെയും പുല്‍ക്കൊടി മുതല്‍ കൊമ്പനാനവരെയും എല്ലാമെല്ലാം ദേവകള്‍. (അവ 'മുപ്പത്തിമുക്കോടി' അഥവാ എണ്ണമറ്റ അളവില്‍ ഉണ്ട്.) ഓരോ ജീവിയുടെയും വാഴ്‌വ് വിശ്വത്തിലെ എല്ലാ ദേവകളുമായും ബന്ധപ്പെട്ടു കിടക്കുന്നു. പ്രത്യക്ഷത്തില്‍ അപകാരികളായവ പോലും സൂക്ഷ്മദൃഷ്ടിയില്‍ ഉപകാരികളാണെന്നു കാണാം. ഒന്നിനും അന്യമായോ അനാവശ്യമായോ മറ്റൊന്നുംതന്നെ പ്രപഞ്ചത്തിലില്ല. പരസ്പരാശ്രയത്തിലൂടെയാണ് ശ്രേയസ്സ്. എല്ലാ വിഭാഗീയതകളും വിഭിന്നതകളും ദുഃഖകാരണങ്ങളാണ്. സ്വാഭാവികമായി നല്കപ്പെടുന്നതല്ലാതെ ഒന്നും പിടിച്ചെടുക്കാന്‍ പാടില്ല. പ്രകൃതിയെ കീഴടക്കുക, ചൂഷണം ചെയ്യുക മുതലായ നിലപാടുകളും അതില്‍നിന്നുളവാകുന്ന നടപടികളും ആത്മഹത്യാപരമാണ്.)
മനുഷ്യന്റെ ചെയ്തികളുടെ ഫലമായി അന്യംനിന്നുപോകുന്ന ജീവിവംശങ്ങള്‍ മുതല്‍ പരിസരമലിനീകരണവും ആഗോളതാപനവും മാരകായുധങ്ങളും ലോകമഹായുദ്ധങ്ങളും വരെ ഉളവാക്കുന്ന വിഷമങ്ങള്‍ ഇപ്പോള്‍ നമ്മെ ഈ പ്രാഥമികപാഠം 'അടിച്ചു പഠിപ്പി'ക്കുന്നു.
'നിയത'മായ കര്‍മം ഏതെന്നറിയാന്‍ ഒരു വിഷമവുമില്ല. ഒരു ചെയ്തി ഈ മഹാവിശ്വത്തിലെ 'ദേവക'ളില്‍ ഏതെങ്കിലും ഒന്നിന് അഹിതമാകുന്നെങ്കില്‍ അത് നിയതമല്ല.
(തുടരും.....)
No comments:
Post a Comment