ശ്രീമദ് ഭഗവദ്ഗീത അദ്ധ്യായം 1 അർജ്ജുനവിഷാദ യോഗം ശ്ളോകം 40 & 41

ശ്രീമദ് ഭഗവദ്ഗീത അദ്ധ്യായം 1 അർജ്ജുനവിഷാദ യോഗം

ശ്ളോകം 40 & 41

കുലക്ഷയേ പ്രണശ്യന്തി 1- 40
കുലധര്‍മാഃ സനാതനാഃ
ധര്‍മേ നഷേ്ട കുലം കൃത്സ്‌നം
അധര്‍മോ/ഭിഭവത്യുത

കുലക്ഷയത്താല്‍ സനാതനങ്ങളായ കുലധര്‍മങ്ങള്‍ നാശപ്പെടും. അപ്പോള്‍, കുലത്തെയാകെ അധര്‍മം ബാധിക്കും.

(എന്നിലെ ഈ വികാരങ്ങള്‍ ഇല്ലാതായാല്‍, അവയുടെ പ്രകടനങ്ങളെന്ന നിലയില്‍ ഞാന്‍ ചിരപുരാതനമായി അനുഷ്ഠിച്ചുപോരുന്ന ചെയ്തികള്‍ ഇല്ലാതാകും. ചെയ്യേണ്ടതു ചെയ്യാതിരുന്നാല്‍ എന്നെ മൊത്തമായി അധര്‍മം ബാധിക്കും. ഉദാഹരണത്തിന്, മദ്യം പൂജാദ്രവ്യമായ ആരാധനാക്രമത്തില്‍ ലഹരി പ്രസാദാനുഭവമാണല്ലോ. പൂജ മുടങ്ങിയാല്‍ മൂര്‍ത്തി കോപിക്കും!).

അധര്‍മാഭിവാത് കൃഷ്ണ 1-41
പ്രദുഷ്യന്തി കുലസ്ത്രീയഃ
സ്ത്രീഷു ദുഷ്ടാസു വാര്‍ഷ്‌ണേയ
ജായതേ വര്‍ണസങ്കരഃ

ഈ അധര്‍മം, അല്ലയോ കൃഷ്ണാ, കുലസ്ത്രീകളെ ദുഷിപ്പിക്കും. കുലസ്ത്രീകള്‍ ദുഷിക്കുമ്പോള്‍ ഹേ, വൃഷ്ണിവംശജാ, വര്‍ണസങ്കരം വന്നുകൂടും.
(ഇവിടെ മറ്റൊരര്‍ഥം കൂടി ഉണ്ട്. ശരീരമെന്ന കുലത്തിലെ കുലസ്ത്രീ മനസ്സാണ്. എന്നെ ബാധിക്കുന്ന അധര്‍മം എന്റെ മനസ്സിനെ ദുഷിപ്പിക്കും. ആ ദുഷിപ്പിന്റെ ഫലമായി അംഗവൈകല്യമുള്ള ആശയശിശുക്കള്‍ ജനിക്കും).