ശ്രീമദ് ഭഗവദ്ഗീത-അദ്ധ്യായം-9- രാജവിദ്യാരാജഗുഹ്യയോഗം- ശ്ളോകം 27
യത്കരോഷി യദശ്നാസി
യജ്ജുഹോഷി ദദാസിയത്
യത്തപസ്യസി കൗന്തേയ
തത് കുരുഷ്വ മദര്‍പ്പണം.
യജ്ജുഹോഷി ദദാസിയത്
യത്തപസ്യസി കൗന്തേയ
തത് കുരുഷ്വ മദര്‍പ്പണം.
അല്ലയോ അര്‍ജ്ജുന, നീ എന്തുചെയ്താലും എന്തു ഭുജിച്ചാലും എന്തു ഹോമം ചെയ്താലും എന്തു ദാനം ചെയ്താലും എന്തു തപസ്സുചെയ്താലും അതൊക്കെ പരമാത്മാവായ എനിക്ക് സമര്‍പ്പണമായി ചെയ്യുക.
നീ എങ്ങനെയെല്ലാം പ്രവര്‍ത്തിച്ചാലും എന്തെല്ലാം സുഖങ്ങള്‍ അനുഭവിച്ചാലും ഏതെല്ലാം വിധത്തിലുളള യാഗങ്ങള്‍ നടത്തിയാലും അര്‍ഹതയുളളവര്‍ക്ക് അവര്‍ ആവശ്യപ്പെടുന്നതനുസരിച്ച് എന്തെല്ലാം പാരിതോഷികങ്ങള്‍ നല്‍കിയാലും നിന്‍റെ സേവകന്മാര്‍ക്ക് എന്തെല്ലാം പ്രതിഫലം കൊടുത്താലും ഏതെല്ലാം തരത്തിലുളള തപസ്സോ വ്രതങ്ങളോ അനുഷ്ഠിച്ചാലും അപ്രകാരമുളള കര്‍മ്മങ്ങള്‍ ഓരോന്നിന്‍റേയും സ്വഭാവമനുസരിച്ച് അങ്ങേയറ്റം ദൃഢമായ പ്രതിപത്തിയോടെ ചെയ്യുന്നതായാലും അതെല്ലാം എനിക്കായി സമര്‍പ്പിക്കുക. എന്നാല്‍ ഇപ്രകാരമൊക്കെ പ്രവര്‍ത്തിച്ചുവെന്ന സംഗതി ഒരിക്കലും നിന്‍റെ അഹംഭാവത്തിന് ഇടം നല്‍കരുത്. എങ്കില്‍ മാത്രമേ എനിക്ക് സമര്‍പ്പിക്കുന്ന കര്‍മ്മങ്ങള്‍ ഉദ്ദേശശുദ്ധിയുളളതും പവിത്രങ്ങളും ആയിരിക്കുകയുളളു.
ഉപാസനയ്ക്കായി സഹിക്കുന്ന ക്ലേശങ്ങളോ അതിന്റെ പേരിലുള്ള കാട്ടിക്കൂട്ടലുകളോ അല്ല ഉപാസനയുടെ പിന്നിലുള്ള മനോഭാവമാണ് നിര്‍ണായകം എന്ന് ഗീത പിന്നെയും പിന്നെയും പറയുന്നു. ജീവിതം മൊത്തമായി ഉപാസനയാക്കാന്‍ കഴിയും. ശരീരത്തിന്റെയും മനസ്സിന്റെയും എല്ലാ ചേഷ്ടകളും പരമാത്മസ്വരൂപത്തില്‍ സമര്‍പ്പിച്ചാല്‍ മതി. കാടും മലയും കയറി ഗുഹയില്‍ ഒളിച്ചിരുന്നു വേണ്ട ഉപാസന. ലൗകികജീവിത ത്തിന്റെ ഒത്ത നടുവില്‍ നിന്നുതന്നെ അതാകാം. അര്‍പ്പണം തികയുന്ന മുറയ്ക്ക് നാല് മഹാത്ഭുതങ്ങള്‍ സംഭവിക്കും.
ഒന്ന് പരമമായ സ്വാതന്ത്ര്യം അനുഭവപ്പെടും. ഞാന്‍ എനിക്കായി ചെയ്യുന്നു എന്ന തോന്നല്‍ പോയിക്കിട്ടുന്നതോടെ ഫലത്തിലുള്ള ആശങ്കയും ഫലവുമായുള്ള വേഴ്ചയിലൂടെയുള്ള സംഗവും ഇല്ലാതാകയാലാണ് സ്വാതന്ത്ര്യം അനുഭവപ്പെടുന്നത്. രണ്ട്, മനസ്സിലും ചെയ്തികളിലും ശുദ്ധിയുണ്ടാവും. ഈശ്വരന് അര്‍പ്പിക്കുന്നതില്‍ അഴുക്കു പാടില്ലല്ലോ. മൂന്ന്, അതിരറ്റ ശക്തി കൈവരും. ഈശ്വരനായിട്ട് ചെയ്യുന്നതില്‍ ഈശ്വരന്റെ മുഴുവന്‍ ശക്തിയും വന്നു ചേരുന്നു. നാല്, ശാന്തസുന്ദരമായ ആനന്ദം എപ്പോഴും കൂടെയുണ്ടാവും. സങ്കടമെന്നത് അജ്ഞാതമാവും. വിദ്യകളുടെ രാജാവായ (യോഗ)വിദ്യയെപ്പറ്റി രഹസ്യങ്ങളുടെ രഹസ്യമായ അറിവാണിത്.
തുടരും..)
No comments:
Post a Comment